Vísað er til tilkynningar Kaldalóns hf. („Kaldalón“) frá 21. júní síðastliðnum þar sem fram kom að undirritaður hefði verið kaupsamningur á milli Skuggasteins ehf., dótturfélags SIKMAS ehf., og Kaldalóns um kaup Skuggasteins ehf. á 50% eignarhlut Kaldalóns í Steinsteypunni ehf. Viðskiptin voru háð hefðbundnum fyrirvörum.

Fyrirvarar viðskiptanna hafa nú verið uppfylltir og gengið hefur verið frá viðskiptunum með undirritun viðauka við kaupsamninginn.

Fjárhæð kaupverðsins í viðskiptunum er óbreytt að því undanskildu að ekki kemur til viðbótargreiðslna til seljanda eins og möguleiki var á. Hluti kaupverðsins er greiddur með fasteignunum Vestmannabraut 22, Búhamri 2, 6, 8 og 10, Básaskersbryggju 2 og Kirkjuveg 20 í Vestmannaeyjum ásamt lausafé fasteignanna. Brunabótamat er samtals 954 m.kr. Fasteignirnar eru tekjuberandi og í skammtíma- og langtímaleigu. Þá hefur Kaldalón undirritað samning við Heimaleigu ehf. um rekstur eignanna. Viðskiptin, sem eru í samræmi við stefnu Kaldalóns um að selja eignir utan kjarnareksturs félagsins, hafa óveruleg áhrif á fjárhag og afkomu Kaldalóns.

Fyrirtækjaráðgjöf Arion banka hf. hafði umsjón með söluferlinu fyrir Kaldalón og BBA//Fjeldco veitti lögfræðilega ráðgjöf.