Stjórn Kaldalóns hefur skipað nefndarmenn í endurskoðunarnefnd og tilnefningarnefnd félagsins í framhaldi af aðalfundi félagsins. Kaldalón hf. leggur áherslu á góða stjórnarhætti og er skipun undirnefnda stjórnar í samræmi við stjórnarháttayfirlýsingu félagsins þar sem kynnt voru áform að setja á fót endurskoðunarnefnd og tilnefningarnefnd.
Tilnefningarnefnd:
Ásgeir Sigurður Ágústsson
Ásgeir er lögmaður og framkvæmdastjóri lögfræðisviðs Rapyd í Evrópu. Áður starfaði Ásgeir meðal annars hjá Logos lögmannsþjónustu í London og Reykjavík, hjá Libra lögmönnum og hjá norsku lögmannsstofunni Schjödt í Brussel. Ásgeir hefur víðtæka reynslu og hefur gegnt ýmsum trúnaðarstörfum í gegnum tíðina. Ásgeir er með fullnaðarpróf í lögfræði frá Háskólanum í Reykjavík og lögmannsréttindi.
Margrét Sveinsdóttir
Margrét Sveinsdóttir er sjálfstætt starfandi stjórnarkona og ráðgjafi. Á árunum 2009 til 2022 var hún framkvæmdastjóri hjá Arion banka, fyrst í Eignastýringu og síðan Mörkuðum. Á árunum 1990 til 2009 var hún hjá Íslandsbanka/Glitni, lengst af í verðbréfaviðskiptum í VÍB og síðar eignastýringu, en síðast í fjárstýringu. Frá 1984 til 1988 var hún í lánadeild Iðnaðarbanka Íslands. Margrét er nú stjórnarformaður Blikastaðalands ehf. og Katla Fund SICAV, ásamt því að vera í varastjórn Árvakurs hf. og Þórsmerkur ehf. Hún hefur áður setið í stjórn Okkar líf hf. og TIF, tryggingarsjóði innstæðueigenda og fjárfesta, ásamt nokkrum stjórnum í Lúxemborg. Margrét er viðskiptafræðingur frá Háskóla Íslands og með MBA frá Babson College í Massachusetts USA. Hún er jafnframt með próf í verðbréfaviðskiptum.
Unnur Lilja Hermannsdóttir
Unnur Lilja Hermannsdóttir er lögmaður og eigandi á Landslögum. Unnur hefur setið í stjórnum stofnana og fyrirtækja og er m.a. formaður stjórnar Ferðatryggingasjóðs. Unnur hefur sinnt kennslu um hlutverk og ábyrgð stjórnarmanna í félögum. Þá hefur Unnur setið í hæfnisnefndum vegna skipana í embætti hjá hinu opinbera. Unnur er með fullnaðarpróf í lögfræði frá Háskólanum í Reykjavík og réttindi til að flytja mál fyrir Landsrétti.
Endurskoðunarnefnd
Endurskoðunarnefnd er skipuð tveimur aðilum úr stjórn félagsins og einum utanaðakomandi. Endurskoðunarnefnd skipa:
Harpa Vífilsdóttir
Harpa starfar sem fjármálastjóri Norvik hf. og situr í stjórn dótturfélags þess, fasteignafélaginu Smáragarður ehf. Harpa er löggiltur endurskoðandi og starfaði í tæpan áratug hjá KPMG og hefur meðal annars komið að endurskoðun fasteignafélaga. Harpa er með meistaragráðu í reikningshaldi og endurskoðun frá Háskólanum í Reykjavík og bachelor gráðu í viðskiptum og stjórnun frá Copenhagen Business School. Harpa hefur mikla reynslu af störfum endurskoðunarnefnda í gegnum störf sín hjá KPMG og Valitor þar sem hún var fjármálastjóri.
Álfheiður Ágústsdóttir, stjórnarmaður í Kaldalóni hf.
Álfheiður er forstjóri Elkem Ísland og situr í stjórnum Elkem Materials inc,, Elkem Rana Norway, Birtu lífeyrissjóð og Klafa ehf. Álfheiður útskrifaðist úr meistaranámi í forystu og stjórnun frá Háskólanum á Bifröst 2020. Álfheiður hefur setið í stjórn Kaldalóns frá apríl 2022.
María Björk Einarsdóttir, stjórnarmaður í Kaldalóni hf.
María hefur starfað sem fjármálastjóri Eimskips frá því um mitt ár 2021 og situr í stjórnum ýmissa félaga sem tengjast samstæðunni. Þar áður var hún framkvæmdastjóri Ölmu íbúðafélags (áður Almenna leigufélagið) um sjö ára bil og leiddi uppbyggingu, fjármögnun og loks sölu félagsins til nýrra eigenda árið 2021. Áður starfaði María í fjármálageiranum sem sérfræðingur á sviði sérhæfðra fjárfestinga, með áherslu á fjárfestingar í fasteignaverkefnum. María hefur setið í stjórn Kaldalóns frá mars 2023.
Nánari upplýsingar veitir,
Jón Þór Gunnarsson, forstjóri
kaldalon@kaldalon.is