Kaldalón hf. Árshlutareikningur fyrstu 6 mánuði ársins 2019

Kaldalón hf. hefur birt árshlutareikning sinn fyrir tímabilið 1. janúar til 30. júní 2019 sem samþykktur var af stjórn félagsins í dag, 30. ágúst 2019

Hagnaður Kaldalóns hf. á fyrri hluta ársins 2019 nam 31,9 milljónum króna. Heildareignir félagsins námu 4,6 milljörðum króna og skuldir félagsins voru 909 milljónir króna. Eigið fé félagsins var 3,7 milljarðar króna í lok tímabilsins.

Reksturinn á fyrri hluta ársins var samkvæmt áætlun. Þá jók félagið hlutafé sitt um tæpar 400 milljónir króna á tímabilinu og undirbúningsvinnu vegna skráningar í kauphöll lauk þann 30. ágúst með skráningu á hlutabréfum félagsins á First North markaðinn.

Á tímabilinu stóðu yfir framkvæmdir við byggingu íbúða á þremur af lóðum félagsins, en það eru Urriðaholtsstræti 14-20 og Urriðaholtsstræti 22  í Garðabæ auk Hafnarbrautar 9-15 í Kópavogi sem félagið á með Íslenskri fjárfestingu. Þessi verkefni eru því farin að skila framlagi til afkomu félagsins. Kaldalón stendur þá samtals að uppbyggingu yfir eitt hundrað íbúða á höfuðborgarsvæðinu. 

Framkvæmdir á lóðum Kaldalóns í Vogabyggð eru nú í undirbúningi og aðalhönnun á fyrstu lóð félagsins af fjórum í fullum gangi. Þar er um að ræða byggingu á 71 íbúð að Stefnisvogi 2 sem gert er ráð fyrir að hefjist í byrjun árs 2020. Upphafi framkvæmda við Vesturbugt var í mars síðastliðnum frestað fram í október en stjórnendur Kaldalóns vinna nú að undirbúningi verkefnisins með það að markmiði að þær geti hafist sem fyrst.

Þá gekk Kaldalón frá kaupum á Steindórsreit við Grandatorg í Reykjavík í apríl síðastliðnum og seldi samhliða því íbúðir félagsins sem nú eru í smíðum að Urriðaholtsstræti 22. Þar hefur verið samþykkt til auglýsingar deiliskipulagsbreyting þar sem fallið er frá áður samþykktum hóteláformum á reitnum en þess í stað gert ráð fyrir byggingu allt að 84 íbúða.

Kaldalón á 50% hlut í steypustöðinni Steinsteypunni. Rekstur hennar gekk vel á tímabilinu og varð umtalsverður vöxtur í rekstri fyrirtækisins.

Uppbygging félagsins hefur gengið vel. Framleiðsla félagsins á íbúðarhúsnæði er komin vel af stað og fleiri verkefni að bætast við á næstu misserum. Markaðssetning á fullbyggðum íbúðum félagsins á almennan markað hefst fyrst að ráði á miðju ári 2021 en kemur svo fram af meiri þunga 2022 og síðar.

Frekari upplýsingar veitir Jónas Þorvaldsson framkvæmdastjóri Kaldalóns í síma 899-9705, jonas@kaldalon.is